MetaCorp y Jeon ta haci un donacion di AFL. 12.633 na fundacionnan local

E pandemia a trece temponan dificil pa e comunidad Arubiano y el'a pone e siguridad di cuminda pa hopi famianan y personanan na nos isla den peliger. Den consideracion cu e pandemia, MetaCorp a habri su conocido Drive-In Theater na Kibaima riba 29 di Juli cu un concierto espectacular di Jeon pa e publico sinta den auto cu cooperacion di Elite Productions, The Movies y Balashi Brewery.

Tur ganashi di e concierto aki ta wordo ofreci como donacion na dos fundacion cu directamente a sostene e comunidad local cu macutonan di cuminda, y a sostene y guia victimanan di violencia domestico. “E idea inicial tras di e concierto aki tawata pa comparti e mensahe di speransa, treciendo musica y goso durante e tempo desafiante aki dunando sosten na comunidad local cu fondonan pa cuminda.”, segun Jeon, ken a inicia e plan pa e concierto caritativo aki. “E reapertura di Drive-In Theater tawata e lugar perfecto pa haci esaki. E ta un escenario pa entretenimento ideal cu ta permiti distanciamento social y ta cumpli cu tur e proceduranan di salud provee pa gobierno.“